Solflekken

Innflytta!

2011-06-28T22:22:00.005+02:00

Vi har no budd i Soflekken i vel 3 veker, og det er sååå godt å vere innflytta. Vi har rett nok ikkje flytta heilt UT av Sollida enno, men det er ikkje så mange kasser som står att. -Likevel er det kjekkast å vere her i nyehuset, så vi må nok motivere oss for å ta det som står att i leilegheita.

Her i nyehuset har vi det fint. Det tek tid å bli kjent med huset, og for det å bli kjent med oss. :) Etter ein IKEA-tur i helga har vi no fått dei kommodane og skapa vi treng for å få tømt dei siste kassane, og det gjer godt å kome i orden. Første vekene var vi heilt utslått, men no har vi litt meir energi til å pusle og ordne, heldigvis. Berre stikk innom om du vil ta ein titt :)

Første vaflemåltid på verandaen. Med fint ver! Når eg ser ut på tjukkeskodda er det ikkje til å tru. Men sola kjem att!!!

Loppis-skapet etter oppussing, med eit nytt bilete vi har fått med gode venner.

Pianoet er på plass, etter ein kontrollert luftetur.

Omnen vår. -Vi skal sjølvsagt ta ut isoporen før vi fyrer. :)

Her i kveldslyset fekk eg så vidt knipsa etekråna.

Då eg starta bloggen var tanken å skrive om det som hende i byggjeperioden og runde av blogginga etterpå. Vi har hatt ein lang, grundig og god byggjeprosess. I desse dagar har vi 7 års bryllaupsdag, men har ikkje merka så mykje til 7 års-krisa, som vi har høyrt snakk om. Det er veldig godt å vere komne i hus, og vi gler oss til å bu oss inn.

Eg kjem til å ta ein lang pause frå blogginga no, og det er heller ikkje sikkert at eg kjem til å skrive fleire innlegg. -Det seier eg ikkje fordi at alle skal kome med "ÅÅÅ, du må ikkje slutt-kommentarar, altså. -Time will sjåvv...

Tuusen takk, alle som har følgd med oss i prosessen. De er hjarteleg velkomne på synfaring, kaffi eller til å slå av ein prat.

God sommar!
Frå konepone og mannbrann

:)

2011-06-06T08:35:00.001+02:00

Vi er innflytta og har det kjempefint. Manglar nettilgong enno, så derfor er det ingen nye innlegg og bilete. Men det kjem etter kvart vil eg tru. :)

Tuddeluuu

6 dagar til innflytting

2011-05-27T22:02:00.002+02:00

I kveld sit eg i sofakroken, ein BigOne er i omnen, og 10 flyttekasser står rundt i stova. I gangen er det 6 til, og i gangen nede er det eit utal posar og bagar. Det nærmar seg innflytting i Solflekken!

No har vi susete hovud og spaghettilange armar, men det er absolutt verd all eigeninnsatsen! Det er så kjekt å byggje sjølv, og med all monterings-trøbbelet på kjøkenet er vi veldig glade for at vi har gjort så mykje sjølv på resten av huset. Det høyrest litt blærete ut, for vi er jo ikkje faglærte. -Dessutan var det veldig profft av kjøkenleverandørane å kome og ordne opp i feila. Men, vi har kosa oss veldig med å byggje heimen vår, og det har stort sett gått veldig fint. Like gode kjær`sta er vi også ;)

Eg var sikker på at eg hadde tatt bilete også av omnen etter montering, men de får vere nøgde med eit før-bilete. :) Fin omn, syns no vi!

Tuddeluuu!

12 dagar til innflytting!

2011-05-21T21:10:00.000+02:00

Gode venner i bloglandia!
Her kjem endeleg nokre foto av korleis stoda er. Det går i tusen og ti for tida, med mange små og store prosjekt vi ønskjer å få ferdige før innflytting om 12 dagar. Men, det er jo ikkje krise om det ikkje er prikkfritt ferdig før innflytting heller, -så lenge vi ikkje gir oss før vi er ferdige ein gong.
Det er absolutt verdt alt arbeidet, men no ser vi fram til å nå målstreken. Konepone har mageverk og mannbrann er berre ørlite grann hektisk og distrahert. (Det må vere fordi han innser at "roger" snart må i containeren)

Vasken på badet er montert. Her kjem skapdører etter kvart, med same farge som kjøkenskapdørene.

Her er loppisskapet eg kjøpte på loppemarknad i september. Det er ikkje så lett å sjå korleis det ser ut, men eg skal kome tilbake med foto når eg har fått kledd det inni med hyllepapir eller tapet, og med nye knottar ute.

Innsida av ytterdøra.

Dusjkabinett, halvvegs montert. Måndag kjem rørleggarane att, og gjer seg ferdige. (Evt. på tysdag)

Her er det snart berre å kome på middag! Å, kor kjekt det blir! (Vi manglar straum og vatn, men kva gjer vel det?) Legg merke til dei totalt malplasserte dørhandtaka... Vi skal få nye skapdører om nokre veker.

P.S.Rett skal vere rett, det er ikkje montøren på fotoet som har montert handtaka.

God helg vidare.

Så kjekt!

2011-05-20T21:56:00.002+02:00

Eg vann konkurransen på annalisasblogg.blogspot.com! Så koseleg! Takk for det, gode Anna Lisa.

Kjem att med fleire bilete av Soflekken, for no har det skjedd mykje siste dagane.
"-Pation, my love..."

konepone.

Tenk, eg vann!!

Kaoskontroll

2011-05-11T22:56:00.004+02:00

Berre eit lite kaosinnlegg i dag. No merkast det at det er på slutten av byggjeperioden :)

I går var det litt småkrise i heimen:

1 Kjøkenmontørmannen var på plass, og sette opp mange fine og lekre kjøkenskuffer og skap. MEN så fann vi ut at vi har laga hol i taket til ventilatorhetta på feil plass. Gurimalla! Men så fann vi ut at med ei 30 cm hylle og ei ekstra foring utvidar vi kjøkenet ørlite, og at ventilatorhetta då vert på rett plass. Puh!

2 Ventilatorhetta viste seg å vere feil pakka, slik at inni emballasjen var det ei vegghengt ventilatorhette! Allereie returnert og tinga ny så klart.

3 Som den siste store brølaren har montøren festa handtaka midt på skapdørene i staden for nede i det hjørnet som ein skulle tru var logisk å feste dei. Då var ikkje ho konepone blid kan de tru. Sukk og stønn. Vi får nye skapdører om minimum 6 veker, og montøren har truleg fått litt refs frå sjefen sin...

Elles skin sola og det er så vidunderleg vakkert ute. Vi har fått utedører i Soflekken, og det kjem seg steg for steg. Forhåpentlegvis 3 veker til innflytting. :)

Vordande skulegut på førskuledag i morgon. Stort!

konepone

Byggjeboblefamilien

2011-05-07T21:35:00.009+02:00

Vestsida på Solflekken. Litt å gjere her også.

Liten venn.

Varmedisen låg som eit tynt teppe over Volda i dag. Det er altså ikkje skodde, sjølv om det kan sjå slik ut.

Kjekt å sjå at naboane held på med graving og muring. :) Velkomne skal dei vere.

I dag gjorde vi ferdig begge guteromma. Ferdig lista, og ferdig måla. Ferdig. :) Det er fantastisk godt å kunne krysse av for at noko er klart til nedvask. Hurra for det! Her er rommet til eldstemann.

Litt arbeid med hjørnelister, fuging og måling, men det vart bra.

Løva i Solflekken! (Etter ein kjekk føremiddag på dok.film)

Litt putl, men fornøgd med kvit hjørnelist der den blå og den kvite veggen møtest.

Pølsegrilling til middag.

Minsten sitt rom.

Helsing frå to i "byggjebobla".

I da`e`dde fredda`!

2011-05-06T22:55:00.004+02:00

Utanfor Soflekken er det full graveaktivitet hos eine naboen, og på andre sida er det eit hav av kvitveis. SÅ vakkert med kvitveisar!! Har sjølvsagt gløymt å ta med fotoapparatet siste dagane, så det får bli ein symbolsk "google-veis" i stadenfor dei ekte sakene frå Soflekken. Elles er det veldig kjekt at det poppar opp fleire hus i nabolaget, og vi gler oss til å sjå både husa og naboane. :)

I dag har vi fått kjøleskap, oppvaskmaskin og tørketrommel, og dei står inntil vidare midt i stova. Ein heilt naturleg stad å vaske skitne tallerkar og tørke dei i trommelen etterpå? Neidå, men på måndag kjem kjøkenet, og då er det godt med alt ikkje står i vegen.

PappaLeif har også trylla gjesterom til oss. FOR ein pappa! Eg vart så rørt då eg såg kor raskt det hadde blitt forandra frå rotelager til ferdig rom. Mannbrann er også iherdig, og eg er veldig imponert over at han held oppe både humøret, tempoet og standarden no på tampen. :)

Kanskje eg kjem att med meir bilete seinare i helga.
Eg er forresten på jakt etter retro-stoff, så viss du har nokon gamle dynetrekk i retrokategorien set eg pris på å få eit vink. :)

God vårnatt.

Kom mai, du skjønne, milde

2011-04-30T22:43:00.001+02:00

Gullegutane overnatta hos farmor natt til i dag, og vi var på rangel. Laaang frukost og koseleg besøk i heimen, før Yngve starta på dagens Solflekken-økt. Vi hadde tenkt å vente nokre dagar med dørene, men så låg dei så kvite og fine og ropte på oss. Så då sette Yngve inn to dørkarmar! Hurra for han. Konepone hadde akrylfugemasse i spikarhol og måla nokre taklister. Babysteps... Men det ER faktisk ikkje så lenge igjen, det er berre ikkje alltid så lett å vere tålmodig.

I etasjeskilja mellom kjellaren og første etasje er vi ferdige med listinga, og slik ser det ut no.

Inn mot eine guterommet. Steikje fine dører...

...her sneik det seg visst inn eit foto av listinga nede i kjellaren...

Sidan vi valde å lage til gjestebadet i "første byggjesteg" (fordi varmtvasstanken skal stå der), blir det til at vi steller i stand gjesterommet også. Her har Yngve og pappaLeif laga til stendarar og sviller.

Det er ikkje berre mot sørvest at utsikta er fin. Her mot søraust ser vi Driveklepp.

Og så har vi hatt besøk av elektrikar og fått brytarar, stikkontakter og ringjeklokke.

Og så har vi tinga oss leikehytte, fordi det var slikt eit knakande godt tilbod på buda. Den får heller liggje flatpakka til vi har fått oss flatt uteområde. Det vart det i staden for innihampen dyre "screen"-uterullegardiner til stoveglasa. For å seie det slik så kosta leikehytta 1/8 av det screenen kosta:) Kan neppe brukast til det same, men her gjeld det å prioritere beinhardt. Det er mange fine lamellar/innerullegardiner også som vi kan prøve ut.

Vil berre igjen presisere at vi er ikkje fullt så einspora til vanleg. No er vi i ei boble og eg er den første til å innrømme at det heilt sikkert ikkje er så lett å føre ein normal samtale med meg/oss.

Det beste med å ha barnevakt denne gongen var at eg rakk å lengte etter gutane. Vart mint på kor viktig det er å vere tilstade "oppi hauda" når ein er i lag med dei. Ikkje tenkje på listemåling og rullegardiner. Berre vere her. no. no.

"Sjå mamma! Vi har funne ei øy! Det går an å flyte kvitveisar nedover elva! KOM og SJÅ då! NO! :)"

DET er det viktigaste.

FOR ein dag!!!

2011-04-23T22:58:00.002+02:00

I år gjekk vi rett frå vinter til sommar, trur eg. Ikkje kvar gong at ungane får bruke ullsett og regnklede, og shorts, same veka. To lykkelege og litt solraude smågutar fulle av is og grillmat ligg no i sengane sine. Heilt herleg.

Vi vaksne har fått rydda litt utanfor huset i dag, og måla nokre lister på vaskerommet og i gangen. Vi er så takksame for at prosessen har gått så bra til no, og for at vi snart kan flytte inn. No er det sokkepåbod i trappa, og vi spekulerer litt på korleis vi skal verne henne medan siste listearbeidet vert gjort, og kjøkenet blir montert. Nokon som har eit godt forslag?

Minsteprinsen bobla av glede og stoltheit i dag, då vi viste fram huset til T og GH

"Tihi! Ej e fått mej møbla på rommet mitt!"

Med ønskje om ei god natt med milde draumar

Påskehelsing

2011-04-21T23:28:00.000+02:00

Heia
No har vi hatt nokre kjekke dagar i Stryn, og det gjorde godt. Det er så godt å lufte seg litt, og å treffe alle i koneponefamilien att, og nokre venner attpåtil. :) Minsten måtte sjølvsagt vere litt sjuk eit par dagar, men no er han frisk att. Det er så godt å kjenne at det vårast, og godt å vere i lag. Det har vore ein lang vinter, og no kjenner ein at både kropp og tanke vaknar igjen. :) Vil ut!

Måndag la mannbrann og konepone parkett i loftsstova, og vi hadde sjølvsagt gløymt fotoapparatet att heime. Sukk... Får håpe vi hugsar det ein av dei næraste dagane.

God påske så lenge.

(Biletet er lånt frå minskole.no, eller rettare sagt frå googlebilete.)

Siste langside

2011-04-14T22:39:00.002+02:00

Det er litt pussig. Kvar gong eg kjem opp til Solflekken tenkjer eg "Å, så langt vi er komne!" Kvar gong eg fer derifrå tenkjer eg "Hm... Jammen mykje arbeid att..." -Og det er sjølv om eg gjer ein god del medan eg er der?!?! Omvend psykologi på eit vis.

Men. No er det snart påske. Vidunderleg med vår i lufta og lette sko på føtene. Vi er ferdige med 80% av listinga, og har også begynt å måle det siste strøket på ein del lister. Kjellarbadet er klart til å få baderomsplater på veggane. Muraren held på med hovudbadet.
Så kjem dørene med karmar på plass. (Heilt av seg sjølv så klart)
Så kjem kjøkenet på plass.(Heilt av seg sjølv så klart)

Poff. Ferdig. Nedvask. Innflytting. Vafle på verandaen.

God helg nokså snart. :)

Trapp!

2011-04-06T22:19:00.003+02:00

O store glede! I dag vart trappa montert, og vi er veldig godt nøgde med henne. Ikkje minst var det fantastisk å kunne trippe lett opp til loftet og at Andreas kunne gå opp. Han har vore forkjøla og astmapjusk nokre dagar, men betre no heldigvis.

No ser huset meir og meir innflyttingsklart ut, sjølv om det står att ein del lister og dørkarmar. Handtverkarane skal starte på det på måndag, og kjøkenet første veka i mai. Så det ligg an til innflytting første dagane i juni. Hurra!

I trappa mellom første og andre etasje er der eit lite vindauge. Veldig glad for at det ikkje kom akkurat der trinna skal vere. Då er det betre at rekkverket sneiar hjørnet i staden.

I går kveld var vi forresten på Kid i Ulsteinvik og handla rullegardiner, persienner og lamellar til den store gullmedalje. -På sal. Godt å ha fått dei i hus, så kan dei monterast i ein fei etter nedvasken.

Så har vi nesten kjøpt eit langbord på Kolbotn, men slått det frå oss i siste liten. No går vi for Ikea sitt "Norden", med plass til maaaange gjestar. Kjem du?

Roger

2011-04-04T22:33:00.004+02:00

Dette er Roger, mannbrann sin kjære recliner frå januar 2000. Roger har opplevd mange laurdagskveldar med fotball, gravide konepone-kvildar, karusellturar med turboprinsane og lesestunder med Yngve og Maarud paprikachips.

Trass i mange gode opplevingar i lag med Roger har han vorte ein kime til diskusjon i heimen siste tida. Saka er den at konepone syns Roger godt kunne hatt godt av ein make-over, noko som er nokså vanskeleg å få til for ein recliner. Det er fleire stolar i "bladå" som er både freshare og snertnare. Mannbrann er enno blenda av kjærleik til Roger, og har ikkje sett det konepone ser av nuppar og appelsinhud både her og der på den stolte lenestolen. Det heile toppa seg her ein dag då konepone støvsugde rundt Roger og fann ein knekt bolt (!) som låg på golvet attmed. Konspirasjon, tenkte mannbrann. Kva er oddsa for at Roger tener oss trufast i 11 år, for så å falle frå kvarandre TILFELDIGVIS to månader før vi flyttar inn i Solflekken?

Det hjelper kanskje heller ikkje å seie til mannbrann at Roger har flytta til "Ein gard på landet med kaniner og høner", og at vi berre kan kjøpe oss ein ny stol?
Nei, Roger, du kan ikkje erstattast. Men det blir ein tung dag (bokstavleg tala) for mannbrann når du skal lempast over kanten på Bøstrand sin container...

;) Ha ein fornøyeleg dag.

Karmar og lister

2011-04-01T22:41:00.004+02:00

Og så var vi tilbake med nokre bilete igjen. I ettermiddag var konepone og pappa i huset, og då var det taklister og glaskarmar i fokus. Veldig triveleg var det! Yngve har vore sjuk denne veka, og har verken fått vore på jobb eller i nyehuset. Heldigvis ser basilluskane til å ta til vit no, og trekkjer seg tilbake i stillheit. Ikkje kjekt med sjuk mannbrann, så det er godt han er på betringens veg

Her er vaskerommet, med ferdig flislagt golv og fuger. Døra skal sjølvsagt skiftast ut når alt er ferdig elles i rommet.

Utsikt frå "framsmettet", der kjøken- og spisebordet kjem til å stå. Herleg med dagslys utover kvelden.

Etter at dette biletet vart knipsa har vi lagt taklister også inne i sofa/TV-kroken

Lisjedo. Utan lister, men med golv. :)

Du er med dette invitert til å kome med eit godt namn på denne kjøken/stove/ete-kroken. "Framsmettet", "Luksusfell" og "Velstandsvorta" er lansert, utan at alle partar er heilt nøgde med det.

Listene rundt kjøkenglasa kom på plass i dag.

Meir "framsmett".

Vi vurderer å avslutte bloggen no, men kan evt. overtalast til å halde fram dersom det kjem nokre kommentarar som seier at det er ønskjeleg at vi held fram. ;)
God helg kvar enn du er i verda.

oj så lenge sidan...

2011-03-31T22:51:00.002+02:00

Altfor lenge sidan oppdatering med foto og slikt. Har eit mål om å ta bilete i helga, men time will sjåv. Brukar tida til å faktisk byggje, og ikkje til å knipse bilete. ;) Dessutan freistar det meir med strikking dei kveldane eg er heime. Bloggtørke er eit ikkje ukjent fenomen vil eg tru.

I kveld kom trappa, og då er det kanskje ikkje så mange dagane til montøren kjem. Det blir FANTASTISK å kunne fyke opp og ned trappa i staden for å klatre i trapper heile tida.
Elles er alle flisgolva ferdig lagde og fuga. Takk for god hjelp frå dei som har vore involvert i praktisk arbeid, pass eller brødbaking. ALt hjelper. :)

Kan elles tipse om www.dengodefeen.blogspot.com som fekk prisen for Årets nynorskbrukar. Veldig munter, inspirerande og oppbyggjeleg blogg som er verd ein visitt.

GOd helg snart.

Konepone

Foccacia :)

2011-03-24T08:35:00.002+01:00

Lovde å sende denne oppskrifta til snille Alice, og tenkte at då kunne eg like godt leggje oppskrifta her så fleire kan snappe henne med seg.

FOCCACIA:

7 dl vatn
25 g gjær (Ein halv pakke altså)
3 + 1 ss olivenolje
1 1/2 ts salt
1/2 ts sukker
ca 14 dl kveitemjøl

Lag ei laus deig, den skal ha konsistens som tjukk graut. Tilset den siste ss olivenoljen mot slutten slik at oljen smører seg rundt deiga. Dekk bollen med plastfolie, og lat heve i ca 30 minutt. Hell deiga i smurd langpanne/kledd med bakepapir. Klapp ut til deiga dekkjer forma. Etterheve utan plast ca 30 minutt. Hell over litt olivenolje, stikk "hol" i deiga med fingertuppane. Dryss litt grovt gourmetsalt over. Eg brukar å blande litt riven ost og litt pizzakrydder i deiga.

20-30 min, 200 grader. (Ikkje varmluft)

Smakar vidundarleg med "fyll":
-8-10 soltørka tomatar
-5-7 skiver salamipølser
-15-20 svarte oliven
-1-2 fedd kvitlauk
-raudlauk
-2 ts provencekrydder/pizzakrydder
-riven ost.

Nyt! (Ein kan godt fryse restane til seinare)

Karmar

2011-03-20T22:40:00.003+01:00

Yngve har teke til å montere glaskarmane, så dei er klare for listing. Dette vindauget er på lisjedo.

Måndag la konepone flis på vaskeromsgolvet. Stolt og nøgd, og syns det vart rett så fint og flatt. I dag har eg stått på kne og skrapa flislim mellom flisane. Det er verkeleg forskrekkeleg kjedeleg arbeid og eg kom ikkje halvvegs ein gong. KJærevene. Verre enn å plukke rips. :) Jaja. Det vog opp at eg fekk pussa ferdig og måla limtredragaren i stova også. Takk for god barnepass i Hjartåbygda!

Dette skapet skal bli lyst med tida. Kjøpte det på Røde kors sin loppemarknad i haust. Vi har køyrt det opp i Solflekken allereie no for det er betre å få pussa det der.

Ha ei god veke, og nyt snøklokkene som kanskje poppar opp snart.

Geléarmar

2011-03-17T22:30:00.003+01:00

Eg har ikkje gløymt dykk. Eg hadde ein klar intensjon om å skrive litt her i dag, MED bilete av dei siste oppdateringane. Men det får bli foto i neste snutt i staden.

No er våren komen til Volda, og det er vi sjølvsagt glade for. :) Litt etter litt smeltar snøen utanfor huset, og moldhaug-tomta vår kjem til syne. Trur ikkje vi får fritidsproblem med det første. :) I går la konepone flis på vaskerommet, og mannbrann testa ut glaskarmbygginga. Listene, karmane og dørene er komne til gards, så det blir hovudfokus dei næraste vekene når det gjeld byggeaktivitetar. Med geléarmar etter flislegginga i går, og gelébein etter slalåmkøyring i dag tek eg kvelden. Dette har vore ei god veke :)

Natti...

Meir golv

2011-03-07T21:55:00.004+01:00

Her er nokre foto av dei golva som er ferdige. Elles kan eg nemne at i dag har vi tinga vaskeromsskapa og benkeplatene, og henta ventilatorhetta. -Veldig glad for alt arbeidet vi har gjort for nokre månader sidan med å tenkje ut lure løysingar, slik at vi no kan surfe inn...

Pocketkarmen til skyvedøra er montert.

Over: SOverom
Under: Stove med golv

Dette er HEILT tilfeldig. Konepone sine fullkorns-"Skorpor" ser brått litt stakkarslege ut ved sidan av sine søte søskenbarn "Muffins" og "Gulrotkake". :) Snart bursdagsgut i heimen, hurra!

Ha ein god marskveld.

"Lägga parketten själv, det kommer nordbaggen aldri klara åt!"

2011-03-03T21:56:00.002+01:00

Åjaudå, desse nordbaggarane er så flinke som berre det. I dag har dei gjort ferdig nesten heile stove/kjøken-rommet. Konepone og turboprinsane kom på visitt, og gutane vart så glade for å få lov til å gå på sokkelestane og utan jakker på nyegolvet. D

Det siste biletet her er frå vaskerommet.

Ha ein god og frisk kveld der ute.
PS. Det er lov å leggje att ein kommentar om du har vore innom bloggen, altså. ;)

Blå

2011-02-26T20:49:00.002+01:00

Veggane i gangsjakta er no ferdige, og han som skal ta mål til trappa kjem på måndag. Vi er faktisk før skjema, men tenkjer golv og listing tek meir tid enn det vi har tenkt på førehand. Så då jamnar det seg ut.

Her er guteromma, med to blå veggar kvar. Fargen kjem ikkje heilt rett fram på fotoet, han er litt mørkare i verkelegheita. Veldig godt nøgd med den. (Gustaviansk blå, glansgrad 10, jotun)

Takk til hjelparane våre i helga, -det er kjekt å sjå så stor framgong for kvar gong. -Sjølv om eg ærleg skal innrømme at vekesvis med sjuke ungar har gjort at eg er nokså sliten og helst skulle hatt nokre ekstra tålmodsgir å skifte til innimellom. Då er det veldig kjekt når vi kan gjere noko kjekt som å ete bollar og drikke kakao ute i 7 plussgrader og sol. :) Og å gå på 3D-kino med kjekke venner etterpå. (Eg vel å heller nemne det, enn å utdjupe det med utålmodigheit og trass...)

God laurdagkveld.

Monstertruck og polkadot

2011-02-25T21:40:00.006+01:00

"ÅÅÅ, sidan de bygg hus kan de få det akkurat som de vil!"

Denne kommentaren får vi ofte. Ja, vi KAN få det som vi vil. Eller rettare sagt: Vi kan få gjere dei prioriteringane vi vil. Og må. For vi er fast bestemte på å ikkje bli fanga av verken luksusfella eller andre feller, og vil halde ein nøktern stil når det gjeld nyinnkjøp.

På andre sida er det jo ein del ting vi treng. Og ein del ting vi ønskjer oss... Og interiørinteressert som eg er trålar eg "bladå" etter lure idear. Men korleis klarer ein å få det både lyst og pent og personleg, gjerne landleg og med innslag av retro??? Det fattar eg ikkje. I bladå er det aldri skitneklede. Dessutan er dei reine kleda alltid kvite eller småblomstra og heng på ei hampsnor i hagen mens sommarvinden blafrar i dei. Barneromma har leiker frå bestefars tid, og slett ingen monstertruckar eller plastikkleiker. Kvar er livet gøymt bak alt det kvite og pene med pastellar og polkadottar? Og kva med treningsutstyr, fotballsko og ski?

Ëg ønskjer sjølvsagt at Soflekken skal verte slik som eg drøymer om. Med kvitmåla loppisfunn, vakre polkadot-koppar, heimebakst og masse venner på besøk. Helst vil eg at det skal vere "perfekt" innreia når alle kjem på besøk første veka. Derfor må eg stadig minne meg på at livet ikkje er eit interiørblad. Livet er mykje betre. Med monstertruckar og polkadottar om einannan. Det viktigaste er å vere i lag. Det blir det aller beste med Solflekken.

God, mild og mjuk helg til dei som les dette. Snart 10 000 som har svippa innom. Heilt utruleg. Takk!

Har forresten kjøpt seng, komfyr, steiketopp og ventilatorhette i dag. Håpar på å få tatt meir foto av huset i morgon. STORE endringar :)

Saturday Night

2011-02-19T21:53:00.003+01:00

Ganggolvet i kjellaren er nesten ferdig.

Biletet over og under er frå kjøkenkroken. Det skal kome ei skyvedør mellom kjøkenet og gangen, og ei kjøken-halvøy frå eine vindauget og inn i rommet, så det er vanskeleg å få heilt taket på korleis det kjem til å sjå ut. Men veggar og tak har vi i alle fall!

Frå stova. Tak og veggar er no på plass, bortsett frå veggen mot "trappeholet".

Parketten kom denne veka, og mannbrann fekk god hjelp med mammaAlice og Stein til å bere inn pakkane med golv. Sidan konepone var heime med astmahosteprinsen tok han med ei parkettfjøl heim så eg fekk sjå. :) Snille mannen.

God helg vidare.

Når vårsol i bakkane blenkjer

2011-02-17T12:50:00.004+01:00

... snart i alle fall! (Og så må de gjerne lese innlegget frå 22. februar i fjor. Peder Stol er rett rundt hjørnet)

Har ikkje foto å vise fram i dag, sidan eg sit på sofaen med ringjande øyreverk og ikkje har vore i Solflekken det siste. Men no er kjøkenet og stova nesten ferdig platekledd, og kjellaren er 1/3 ferdig flislagd.

Eg er ivrig lesar av ulike interiørblad for tida, og må innrømme at eg er litt fascinert av slike ord på veggen. "Wallstickers" som det heiter på fint. Veit nokon om ein stad der ein kan få laga sine eigne ord?

Sokkane

Der går du over stovegolvet
Lett på foten flyg du framover
Eg vert sitjande å smile
På føtene har du sokkar
Tjukkesokkar
To ulike tjukkesokkar

Y.V.

Rapport veke 6

2011-02-11T12:44:00.003+01:00

Det skjer stadig endringar i Soflekken, også denne veka, sjølv om vi hadde eit anna fokus måndag og tysdag. Minsteprinsen var sjuk og måtte innom barneavdelinga for å få medisin ei natt, men er no på betringens veg og det er så godt. Ingen ting er viktigare enn borna, og når dei er sjuke vert alt anna uvesentleg.

No er arbeidet i gang igjen, og 2. etg er så godt som ferdig platekledd i tak og på veggane. Badegolvet vert støypt medan eg skriv dette her. Det skal stå til tørking dei næraste 6 vekene eller så, før dei kan flislegge det. No er det taket i 1. etasje som står for tur, og flislegging av ganggolvet i kjellaren. Det er veldig spennande å sjå kor det tek form. Konepone er mykje heime i lag med prinsane, og syns det går fint. Likevel gledar eg meg veldig til vi er komne i hus og kan vere i lag alle fire igjen. Det ville vore rart viss ikkje gjorde det...

Biletet over og under er frå loftsstova, og taket i trappegangen. Det grå rekkverket er provisorisk no i arbeidsperioden, og trappa skal gå ned til venstre i trappeholet.

Enn så lenge går stigen opp til vårt soverom, men her vert også vegg med tida. Planen er å gjere ferdig veggar, tak og golv som høyrer til trappeholet, slik at trappa kan tingast. Ho skal lagast etter mål, og har litt produksjonstid.

Konepone avbraut studiet sitt no når minsteprinsen vart sjuk. Det var mykje fram og tilbake og om og men, men det er eigentleg ein lettelse no når avgjerda er teken og eg har sagt frå til alle involverte. Forhåpentlegvis går det i orden å starte på att neste gong studiet er. No prøver eg å ikkje tenkje meir på det, men å fokusere på born, hus, heim og jobb. Det er travle tider, men likevel boblar eg nesten over av kreativ skapartrong no når våren nærmar seg, og skulle gjerne hatt mange timar ekstra i døgnet til å måle loppis-funn og andre ting. Det får vente litt til... Men no når eg er heime med pjuskeminsten gler eg meg over at sola kjem inn i Sollida meir og meir for kvar dag, og at det går mot vår. Håpar på friske tider både for oss og deg som les dette her.

We`ve got walls 2

2011-02-05T21:32:00.003+01:00

Førige innlegg med denne tittelen handla om at vi hadde fått veggar på huset. No har vi altså fått teke til på å plate innerveggane. Det er veldig kjekt å sjå at det tek form og at det blir store og lyse rom. Vi har Huntonit ferdigmåla veggar over alt, men i ulik profil. På soveromma har vi smale "gammaldagse panel"-plater, og på loftsstova og i 1. etg har vi den som heiter "perle". ALt i kvitt, men det er ikkje så kvitt som eit kopipapir altså. Meir som eggeskal. Veldig godt nøgd med det.
Og så skal gutane få ein blå vegg, og konepone få ein grå vegg eller to i stova.

I dag har mannbrann og pappaLeif laga til loftsstova og avretta kjellargolvet så det er klart til flislegging. Det er eit poeng å verte ferdige med trappe"sjakta" slik at trappelagarane får kome og ta mål og lage trappa. No er der berre stigar, og eg GLEDAR MEG til å sleppe dei, men å kunne trippe opp og ned i ei skikkeleg trapp.

Dette er frå Master of the House sitt soverom

Vi har fått pipe!

Frå loftsstova. Etter at fotoet vart teke er også resten av veggane så godt som ferdig plata.

Eit av guteromma.

I dag laga konepone telt på kjøkenbordet og varma bollar og aniskringler i omnen medan gutane var opptekne i stova. Så laga eg invitasjon til telttur, og putta den i ein konvolutt. Dei syns det var kjempekjekt å oppdage at kjøkbordet var blitt til eit telt, og at der var mjelk på Sabeltann- og Lynetflasker, og deileg bakst. ÅÅÅ så kjekt å sitje i lag med to godingar under kjøkenbordet og ete lunsj. :) "Gullestund" kallar eg slike stunder.

Må berre også takke mi søte storesøster for ei herleg kasse med låne-spel, kakebakst-posar, kakepynt, interiørblad, lommelyktbatteri, plastallina osv, og ei lang idèliste til kva ein kan finne på å gjere i lag. Det er farleg å starte på ei takkeliste, for då er det alltid nokon som blir litt skuffa. Vit at vi set uendeleg stor pris på alle gode oppmuntrande ord, hjelpande passe-hender og heimelaga brød. TAKK!

God helg alle saman!
Mr and Mrs Master of the House (-keeper of the zoo)

6 tonn plater i hus!

2011-01-31T22:05:00.003+01:00

Vel... Det skal seiast at der er nokre fleire platehaugar i huset enn det som viser på fotoet. :) I dag kom lastebilen med alle tak- og veggplatene til Solflekken. Stor takk til Steinar, Stig, Sindre, Anders, Morten og Gunnar F for god berehjelp i lag med mannbrann.

I morgon kjem sannsynlegvis pipa. Det blir spennande å sjå om det akkurat då kjem bøttevis med regn i øvre Bratteberg. Litt sommarfuglar i magen.

Konepone og mannbrann

Klart for plater!

2011-01-29T22:30:00.003+01:00

I dag har vi hatt ein herleg dag på leikeland i Spjelkavika, i familiens teikn. Første fridag i lag på aldri så lenge, og det gjorde godt å få vere i lag og å lufte seg litt. Eigentleg skulle materialen til tak og veggar kome med lastebil fredag, men vart utsett til måndag. KJedeleg, sidan vi hadde kalla inn dugnadsgjengen til fredag. Håpar dei som hadde sett av ettermiddagen ikkje vart altfor skuffa over å få fri. No står huset og tørkar, slik at stendarane skal vri seg ferdige. Så kan vi rette på dei før vi spikrar på veggplatene.
For dei som lurer så er vi ikkje så einspora som denne eposten kan gje uttrykk for. Men denne bloggen er ein byggjeblogg, så då blir det mykje bygging. :)

Badet til venstre, og eit guterom til høgre. I kottet bak badet ligg ventilasjonsrør og alt som har med det vegghengte doet å gjere. Vi tenkte eigentleg å ha eit standard-do, men så vart røropplegget slik at då ville vi sitje med låret inn mot veggen, og det er jo litt småkjedeleg. Derfor måtte vi (huff så leit) til med vegghengt.

Her ser vi ytste hjørnet i stova, der det etter kvart vert ein "glane-boks" og sofa

Pianokrok og utsikt mot sør.

Her skal spisestova/kjøkenbordet stå. Håpar på mange kjekke besøk, gode samtalar og måltid i "framsmettet". Eg skulle ønskje døgnet hadde eit par timar ekstra i døgnet, for eg har sååå mange planar. Måle kjøkenstolane, loppis-skjenken og guterom-bordet til gutane, . Jaja. Det får bli litt langsmed. :)

Kjøkenet, med opa løysing til stova. Her blir det ei kjøken-halvøy med ventilatorhette over.

Vaskerom!

Her er loftsstova ferdig plasta. Mykje arbeid med vinklane i taket, seier dei som har jobba med det. Her er det ei fantastisk utsikt når det er lyst. :)

Eine guterommet, med det koselege vesle vindauget. Vi droppa tak-vindauge, fordi vi ikkje hadde lyst på regn-tromming på glaset, og eventuelle lekkasjar. Men lover og reglar om kor mykje lys som skal kome inn på så og så mange kvadratmeter tilsa at vi måtte ha eit lite vindauge på veggen. Eg syns det er heilt topp!

Til veka ventar vi pipe, material-leveranse og varmekablar og støyp på badegolv(ikkje vi som skal gjere)
Ønskjer akkurat DEG alt det beste for veka som kjem. Eg gler meg over ein lys rosa tulipanbukett på bordet her. Snart kjem våren. Snart.

Solflekk-søndag

2011-01-23T20:37:00.002+01:00

Den siste tida har det blitt sjeldne og ikkje særleg utfyllande blogginnlegg. Det kjem slett ikkje av at vi har lagt ned arbeidet i sjølve huset. Elektrikarane er stort sett ferdige, og rørleggarane har att eit par dagars arbeid før det er klart for å leggje fuktsperrer i alle ytterveggar og tak, og isolasjon i innerveggane.

Mannbrann har lagt fuktsperre ("plasta") i veggar og tak på eine barnerommet i dag. I det heile er vi veldig godt nøgde med storleiken og utforminga på romma. Det blir spennande å sjå korleis det vert med veggplater og møblar.

Onsdag, torsdag eller fredag komande veke kjem det eit lass med tak- og veggplater. Dersom du vil vere med på dugnad er vi takksame for kvar ei hand som kan hjelpe til å bere inn det som kjem.

Laurdag hadde mannbrann og konepone ein runde og tok ut flisar og undersøkte prisar på kvitevarer. Det er skummelt kjekt å ha slike rundar. Ikkje kvar dag ein får "anbod" på 5-6 kvitevarer/"brunevarer" i slengen. Vi er vande til å leve nøkternt, så det er nesten til å få mageknip av slike summar.

Ha ei god veke.
Eg drøymer om sommarvind....

KORT rapport frå Solflekken

2011-01-17T21:31:00.002+01:00

Hei du der ute i blogglandia

Vi er no ferdige med alle lettveggar i huset vårt, og elektrikaren har starta på arbeidet sitt. :) Fullt tempo, og vi er sååå glade og takksame for hjelp på alle område. Vi er jammen heldige som har så gode og trufaste støttespelarar.

Dårleg med bilete denne gongen. Kjem sterkare att.

konepone

Full fres!

2011-01-05T22:49:00.002+01:00

NO er vi i full gang med lekting, ventilasjon og etter kvart sentralstøvsugar og lettveggar. Hurra! Arbeidsfordelinga seier seg sjølv, med konepone heime hos gullgutane, og mannbrann i nyehuset på kveldane. Utebileta tok vi søndag, då vi moka snø i Solflekken alle fire. Tre timar ute, med snø til godt over brystkasse-høgd på minsten. Ei riktig god-stund i lag.

Ønskjer alle der ute eit mildt og mjukt 2011.

Prikkar, veggar og slikt

2010-12-27T22:36:00.002+01:00

Har ikkje hatt med fotoapparat i dag, så du får bere over med at eg ikkje har lagt ut bilete. Vi er no ferdige med å isolere innsida av ytterveggane og taket. Yngve og Steinar har teke til med lettveggar og tilpassing av ventilasjonsrør, og i morgon kjem pappaLeif og held fram med det same. Eg har stappa isolasjonsrestar i søppelsekkar nokre timar i dag, og mest vore mamma og husmor heime.

Det er godt å vite at vi er i nytt hus før sola snur neste gong, og at no vert morgonane og kveldane stadig lysare og lettare. Det er mykje arbeid som står att før vi kan flytte inn, men vi er i eit godt driv så vi håpar det skal gå fint. Ikkje minst kan eg glede meg over alle prikkane vi fekk til jul. (På koppar og fat)

Å glede seg er også ei glede.
Framleis god jul til alle der ute. Eg håpar på friske born framover...

Glava i lange baner

2010-12-13T12:29:00.003+01:00

Tysdag kom ein lastebil med Glava til Solflekken. Yngve var i Bergen og fekk augebehandling/operasjon, men takka vere hjelp frå Sveinar, Morten, Anders og Gunnar fekk konepone inn alle pakkane med isolasjon same kveld. Ungane var med Vivian. Takk alle saman for uvurderleg hjelp! Vi vonar vi ein gong kan få gje litt hjelp tilbake.
Denne kvelden var det perfekt ver for å bere inn isolasjon, tørt og kaldt. Dagen etterpå lava det ned 40 cm snø, så vi var utruleg heldige.

Laurdag var konepone, PappaLeif og PappaSteinar i Solflekken og starta med å isolere innsida av ytterveggane i 1. etasje. Kan absolutt anbefale å bruke skjerebrett for Glava. Vi fekk også starta så vidt på loftet.

God St.Lucia-dag :) Vi gler oss til adventsfest i barnehagen i kveld.

Fredagsblogg

2010-12-03T21:42:00.003+01:00

No har vi fått begynne å montere ventilasjonsanlegg inne, og eg syns mannbrann er veldig flink! Han studerer teikningar på senga til og med, og eg er viss på at ventilasjonsanlegget vert slik det skal vere. Snikarane har teke til med verandaen, og det ser også fint ut. Blir endå betre med ei solseng og eit glas iskald brus på, -med tida. :) Over helga kjem isolasjonen, så då prioriterer vi å isolere ytterveggar og tak mot kaldloft, og ha på fuktsperre, slik at vi kan setje på varmeomnen etterpå. Og ja, eg blir nokså god på faguttrykk eg også syns eg. :)

Riktig god helg frå nyryddarkonepone og -mannbrann

2010-11-26T22:15:00.003+01:00

Fint å blande fuglemix og smelta flot-eller delfiafeitt, utan salt, til småpippane no i vinterkulden. Vi brukte nokre store og nokre små peparkakeformer, men fann ut at det var best med dei små og mellomstore, for skjora tok dei store.

Taket er ferdig, og manglar berre pipe. Stillasa er nedtekne, og no ser vi så mykje betre korleis huset vårt ser ut. Vi er forelska. :) Og så var det så kjekt å få vise det til brorJonnen denne veka. Han hadde ikkje vore opp i tomta ein gong før no, så det var veldig kjekt å få vise han og J rundt på Solflekken. No er tørkeomnane på, og då er det ikkje lenge til vi får starte inne.

Vi er så heldige som får oppleve at byggjedraumen vert sann. Visst går vi travle dagar i møte, med eigeninnsats rett rundt hjørnet. Men så er det ein bra premie også.

Om du veit om ein bra byggeblogg som nokon andre skriv må du gjerne leggje att ein kommentar med lekkje til han. KJekt å følgje andre i prosessen også.

God helg.
Mannbrann og konepone

Taksteinane er på plass

2010-11-24T22:16:00.003+01:00

Siste veka har det vore kaldt og klart her i Volda. Snekkaren og lærlingen er på plass, og no har taket fått takstein. Vi er veldig godt nøgde med fargen. :) Bileta er frå i går, så deï er ikkje heilt oppdaterte. Om ein månad er det julaftan, så det er ikkje så mykje lys til å knipse hus-bilete etter arbeidstid. Ventilasjonsanlegget har komt, så forhåpentlegvis får vi ta til med å installere det om ei vekes tid. Kanskje. :)

Denne helga kom mamma og pappa frå Stryn og sette inn ei dør til oss. Takk for det! Gler meg til i morgon, for då kjem storebror og tantebarn for å sjå Solflekken for aller første gong.

Ha ein mild og mjuk vinterkveld.

Eg skal innrømme...

2010-11-15T22:42:00.002+01:00

..at no gledar eg meg veldig til vi kan starte på eigeninnsatsen.

Det var alt for i dag.

Steg for steg

2010-11-11T21:58:00.004+01:00

Vindskeiene og bordkledninga er oppkomne, hurra! Til høgre ser vi at klossane og listene rundt kjøkenglasa er ferdige. Vi trur det er "pausearbeid", som dei tek langsmed viss dei ventar på at andre ting skal verte klare. Det ser litt komisk ut med ulik listing rundt alle glasa, men det blir bra til slutt :) Ikkje minst til våren når vi får måla huset og listene.

Her ser vi lisjetaket over verandadøra, som har fått takstein på seg! Vi syns det er passeleg gammaldags med rustikke raudbrune taksteinar til dette huset, og er godt nøgde med valet så lang:) På denne sida er også mønekrysset montert.
Snikkaren poserer attmed lisjetaket.

Elles har det blitt lite "husarbeid" denne veka, med 100-års jubileum for skulen, og mannbrann sin tur til Bergen, så vi håpar å kome sterkare attende. Snart er det tid for eigeninnsats, og vi skal starte med å setje inn dørene og få opp varmen inne så materiala vert tørre, før ventilasjonsanlegget skal monterast.

"Vinter og sne, en skiløper suser av sted"

2010-11-07T21:29:00.004+01:00

Vi avslutta helga med aketur på kjelke i Dalevegen. Til frydefulle kvin frå stor og dei to små, og litt gråt frå den minste fordi farten vart for høg :) Nydeleg vinterver, stjerneklart og aprikosfarga himmel i vest, før det vart heilt svart. Nokså trygt enno, sidan gatelysa ikkje er monterte og vi såg VELDIG godt den eine mopeden frå lang avstand og kunne pelle oss ut av vegen.

Elles har vi fått takstein på nordsida av taket, og vindskeier over alt. Det tek til å sjå litt meir ferdig ut, og det er fint. :) Vi får sjå kor tid det vert mildver så resten av taket får stein også. Det er no tett i alle fall. Elles har det vore lite fotografering i det siste. Vi fekk ein støkk førige søndag då stillaset hadde blese ned, men no er det oppattkome og sikra. :)

Ha ei god veke.

Den siste oktoberrapporten

2010-10-30T21:18:00.004+02:00

I dag, laurdag!, har snikkarane sett inn verandadøra, samt nokre pynteklossar på vindauget attmed. Det ser litt snodig ut no når dei er lysegrå, og listene er grå. Til våren skal vi måle listene kvite så då vert det bra trur vi.

Nesten ferdig austvegg. Her skal det også kome slike pynteklossar på vindaugslistene.

Stadig meir borkledning, og no også eit lite overbygg til verandadøra.

Dette biletet er teke ut bilvindauget mot Vikeneskaia ein dag denne veka. (Eg køyrde ikkje samstundes, så klart) No er det verkeleg haustver i Volda.

Å glede seg er også ei glede

2010-10-29T20:51:00.003+02:00

brukte eg å seie då eg var mindre. Ja, eg seier det vel enno, og meiner det verkeleg. Det ER ei glede å kunne glede seg til noko.

Vi har det fint og flott her vi bur no, men sjølvsagt vert det litt annleis oppi Solflekken. Dette er glede seg til-lista for i dag:
1: Gode tørkemoglegheiter for skitne og våte barnehageregnklede
2: Sleppe å trakke ned kvarandre på badet
3: Vedaomn

No er austveggen ferdig kledd, og vindskeiene er på plass på den sida. Elles er det litt halvferdig over det heile, men det er endringar kvar dag.

Ha ei retteleg god helg alle saman.
Helsing konepone og mannbrann

Snøflekken

2010-10-20T18:24:00.002+02:00

No er det lenge sidan vi har lagt ut noko nytt frå Solflekken. Snikkarane har hatt eit par dagar der dei har jobba på eit anna prosjekt, men no er dei tilbake att. Bordkledninga er ferdig oppspikra på delar av huset, og taksteinane er levert.

Ungane jublar over snøen i dag, og sant å seie syns konepone at det var herleg med lys rein snø ho også.

God oktoberkveld

Vindauge på plass

2010-10-10T22:56:00.001+02:00

Fantastisk å sjå ut også!

Tett tak!

2010-10-07T22:27:00.002+02:00

I dag måtte vi opp med kake til snekkarane, for no er taket tett! Her går det unna. Yngve var opp i Solflekken i kveld, og då var arbeidskarane der enno, og i lag fekk dei bore vindauga opp i hovudetasjen. Viss vi er heldige er vindauga monterte i morgon.
Ha ein god solskinsdag i morgon.

What a difference a day makes

2010-10-02T20:56:00.003+02:00

Torsdag

Snekkarane har no bygt arka/framsmettet, og då ser vi meir korleis huset vert. I tillegg har dei pakka inn alle veggane med asfaltplater og har starta å skjere ut for vindauga. Det er så kjekt å sjå framstega! Både snekkarane og Yngve har vore litt sjuke denne veka, og ikkje fått gjort så mykje som planlagt. No er det godt det er haustferie for oss, så kanskje vi får gjort litt meir med mellom anna støttemuren. Vi håpar det fantastiske haustveret held fram.

Fredag

Denne månaden har vi eigd tomta eitt år, og vi er godt nøgde med prosessen så langt. Det er ekstra kjekt at fleire har begynt skoging i Dalevegen, og at vi snart vert fleire som bygg der. :)

Kvifor more seg inne når ein kan mure seg ute?

2010-09-26T22:33:00.004+02:00

Laurdag var det dugnad på å setje opp støttemuren bak huset. Vi brukte Asak ministøttemur, som verken skulle støypast eller leggast jern i. I sommar støypte vi fundamentet, så no var det klart for å stable 20-kilos mursteinar oppå. Dei låser seg i kvarandre, slik at muren hallar litt bakover og støttar jordmassane bak huset.

Vi fekk fantastisk god hjelp av pappaLeif, Stein Arne, Stein og Sveinar til muringa. Mødrene våra passa gutane og laga deileg fårefrikasse til middag. Stor hjelp dei også. TUSEN TAKK for at de er så hjelpsame og støttar oss i husbygginga.

PappaLeif hadde leigt ei nyttig lita maskin som var utruleg sterk. Mursteinane var såpass tunge at det heldt med to stk i ei vanleg trillebåre, medan den oransje hjelparen klarte 16 stk i slengen opp bakken. I tillegg var det enkelt å lesse singel opp i lastekassa med skuffa. :)

Etter fire timars arbeid og fem rader med mur måtte vi gje tapt for dårleg sikring og god tyngdekraft. Plutseleg seig 2/3 av muren overende. Vi hadde vurdert han som såpass sikker at vi hadde stabla stein på stein heilt til det skar seg. Konepone fekk nokre solide blåmerke, men elles var det ingen skadde. Heldigvis.

Etter ein liten og taus pustepause spytta vi i arbeidshanskane og rydda vekk knuste steinblokker, og pusla saman muren igjen. Det tok overraskande lite tid å rette opp att muren, og på slutten av dagen hadde vi fått opp til huset alle steinblokkene til muren, og fått sikra baksida av muren med stein, singel og jord. No veltar han i alle fall ikkje.

Vi ventar på nokre hjørne før vi kan ferdigstille austenden av muren. På vestsida må vi kutte til hjørna sjølve, så det vert kveldsprosjektet til mannbrann framover. Elles skal det sjølvsagt stellast til i bakken bakom huset, og så skal vi fylle meir singel mellom huset og muren. Alt til si tid. Ha ei nydeleg solskinsveke.

Fått ein vegg, -ikkje møtt veggen

2010-09-24T22:40:00.003+02:00

Kort kort oppdatering:
Toppdragar OK
Austvegg OK
Golv 2. etasje OK
Stillas oppe OK
Støttemurdugnad i morgon OK

God helg. Bilete kjem nok etter murearbeidet i morgon.

Takstolar

2010-09-16T17:58:00.002+02:00

Måndag kom krana som løfta på plass takstolane. Store endringar på få timar!

Toppdragaren som vart levert var 70 cm for kort, men det kjem ny om ikkje så lenge.

Stillaset er på plass, og arbeidsbrakka også. På heimefronten har vi starta baderomsplanlegginga, og avslutta kjøkenplanane. Ein skulle nesten tru at vi skal flytte inn etter helga, men det kan vere ein fordel å få litt tettare veggar og tak først. Alt har gått veldig fint til no, og vi håpar berre på tørt og fint ver framover. -Ikkje minst for dei som skal sanke sauer laurdag.

Fluge på veggen?

2010-09-12T21:36:00.003+02:00

No har vi fått veggar, om enn litt luftige enno. I morgon kjem krana og heiser på plass takstolane, så her går det fort framover. :) Det er utruleg kjekt å sjå ut gjennom "vindauga" i hovudetasjen på den flotte utsikta.

Her i framsmettet skal spisebordet stå. Takk til pappaLeif som kom med forslag om å lage framsmett, i staden for å ha ein slett vegg på sør-sida. Det er vi glade for at vi tok til oss. Her blir det mykje god mat og mange kjekke middagsbesøk med tida.

Nattvandring

2010-09-08T21:43:00.000+02:00

We`ve got walls!

Fredagsrapport

2010-09-03T21:11:00.002+02:00

Denne veka har snekkaren og lærlingen hans lagt på reima og bjelkelaget på huset. Vi var ein tur oppi tomta, som vi framleis kallar det, etter middag, og då var arbeidarane der enno. Det lovar godt! Det har vore fantastisk seinsommarver med sol og gode temperaturar, og då har det vore ekstra kjekt å arbeide ute, sa snekkarane. No er golvplatene limte og skrua fast på om lag halvparten av 1. etasje. -Veldig kjekt dei tek jobben med å skrue dei, så slepp vi det når vi skal til med innreiinga. På biletet ser vi også at framsmettet tek form, og der skal det kome høge vindauge etter kvart. Og eg skal få kjøpe store grøne plantar viss eg syns det blir litt vel mykje innsyn. (Bra kompromiss)

Berre så det er sagt, no vert det færre besøk med ungane i tomta, og mykje strengare "hand-haldingsregel" eller "sitje på armen-regel" dei gongane dei er med opp for å kike. Her er mange farar akkurat no.

Her ser de også fundamentet til støttemuren bak huset. Når dei 16 pallane med murstein kjem til Solflekken kjem vi til å ha eit sterkt ønskje om litt dugnadshjelp. Vi veit ikkje enno om det skjer om ei veke eller tre, men når dei kjem må vi pusle mur raskt som berre det slik at pallane ikkje tek opp plass for snekkarane. Heldigvis er det byggjeklossar som ikkje skal ha mørtel eller puss, så vi trur det skal gå greitt. I alle fall med litt berehjelp, om vi er så heldige å få det. :)

Utsikt ned i kjellarstova. :) Men, om 3-4 veker er huset reist og tett viss alt går etter planen, og så går det eit par månader til før huset er ferdig utvendig. :)

Det er så kjekt å kome opp kvar ettermiddag og sjå framstega. Det er mogleg at vi høyrest litt euforisk glade ut, men det er mykje kjekkare det enn å klage fordi det er lenge til vi kan flytte inn. Håpar den optimistiske tonen held seg også uti februar. :)

God helg, alle saman.

I morgon :)

2010-08-29T22:58:00.002+02:00

...kjem snekkaren! Hurra!
Dei siste to vekene har vi pusta litt på når det gjeld byggjeaktivitet. Vi har berre tinga 14 tonn murstein til støttemuren bak huset.

Forhåpentlegvis vert det meir å skrive om dei næraste vekene.
Vent og sjå. :)

Første etappe er ferdig

2010-08-15T22:15:00.002+02:00

Her er nokre oppdaterte bilete frå Soflekken bada i sol. Her ser de dei siste endringane vi gjorde førige veke. No er det klart for snekkarane. :)

Kjendishus

2010-08-14T22:04:00.003+02:00

Huset og vi har visstnok blitt småkjendisar. Biletet er henta frå nettutgåva til Møre i dag.

I kveld er vi veldig glade og litt tunge i armane og i blikket. Vi har klart å nå målet for sommaren. Vi har sett opp muren, fått støypt både den, vi har støypt plata til huset og plata til carporten, jamna bak huset og pussa deler av muren. Vi treng ein liten støttemur bak huset for at ikkje molda skal rase ned mot huset. Denne muren har vi også støypt fundamentet til. Tusen takk til alle som har hjelpt med mat, arbeid, pass, oppmuntring og rådslaging. Det er uendeleg godt å sjå kor langt vi er komne. Og så er det så godt at gutane også har hatt ein fin sommar trass i mykje bygging.

Til veka kjem snekkarane, og det blir heilt greitt å få ein liten sjølvbyggjarpause no når det er skulestart. Det blir kjekt å sjå at huset veks sjølv om vi er på skulen. Eg gløymde å ta nye bilete av Solflekken i dag, men skal prøve å hugse på det i morgon.

Stor dag i morgon

2010-08-09T22:40:00.002+02:00

Eit lite innlegg om ei stor hending.
I morgon tidleg kjem betongen og ein kar som skal støype plata inni huset vårt. Det vert spennande å sjå korleis det går, og å få golv i huset. :) Vi er glade vi har leigd fagfolk til denne biten, sidan det er krevjande både med hallinga og å få rett tjukkelse på plata. -Denne hallinga er ikkje som andre hallingar, som mannbrann dansar så lett.

Spennande...

I rute i regn

2010-08-06T22:44:00.004+02:00

Å kor godt det er med sommardagar der ein ikkje tenkjer så mykje. Med det meiner eg at det er godt å vere i rute med huset, og framleis ha mange feriedagar att. Vi har pussa ferdig på aust, vest og nordsida av muren, starta arbeidet med knasteplast og singling bak huset og lagt armeringsmatter inne. I tillegg ringde elektrikaren i dag tidleg og lurte på om han kunne få legge varmekablar allereie i dag i staden for etter helga. Herleg når ting skjer, -til og med før planen.

Vi heime har hatt besøk av ein liten venn som har leika med gutane. Det er så godt å sjå kor dei har vakse i sommar, og kor fint dei har det i lag.
Nysteikte bollar, regnvèrsleik ute og sjøslag inne.

Flinke mannbrann har tenkt seg på Saudehornet i morgon, og så skal eg få gå på den nyopna interiørbutikken i Ørsta etterpå. Kvar si lyst. :)

Puss puss så får du eit hus

2010-08-02T21:12:00.003+02:00

Først eit godt lag med fiberpuss på rubba mur.

Fiberduken som blir baka inn i pussen.

No er konepone ferdig med første lag med murpuss på dei sidene av huset der det skal fyllast innåt. Då vert det ei bra overlapping med både murpuss og knasteplast+isopor.

Ein kar som gjekk tur forbi huset stoppa medan eg heldt på. -Eg har aldri sett ei dame pusse mur før, utbraut han. Eg måtte le litt då. Det er faktisk nokså kjekt å pusse mur, og å sjå at ein lagar fin og jamn veggflate i staden for den oppdelte "legokloss"-veggen. Vi må nok vente til etter at vindauga er sette inn på sør-veggen før vi kan pusse der.

Riktig varm sommarhelsing i regnveret. Takk for at du var innom :)

Ferie og "fyleveir"

2010-07-21T21:59:00.005+02:00

Dagen før avreise til Stryn og Lilleputthammer! No ligg tre barn og søv så søtt. -Vi har lånt eitt ekstra i kveld :) Ute fløymer takrennene over, og grautskodda ligg langt nedom Kalsethola. Heldigvis er det meldt sol og finever der vi har tenkt oss, for her er det skikkeleg fyleveir, som vi seier i Stryn. I tomta ligg det litt material utover som ventar på å bli skrapa reine for betongrestar. Der er også ein haug med avkapp av Vartdal-muren. Men no er det ferie nokre dagar. Yngve har vaska bilen, så då kan vi sitje i den utan å måtte ha arbeidsklede på oss.

No er det ei knapp veke før eg kjem innom bloggen att. Eg er litt nyfiken på kven det er som vitjar byggjebloggen vår, så du kan gjerne att eit lite teikn viss du vil:) God julikveld.

Vellukka støyping av mur!

2010-07-16T22:23:00.003+02:00

Takk og lov!
Muren vart støypt i dag, og alt ser heilt fint ut. Tuuuusen takk for hjelpa, Stein Arne, Stig, Morten, Gunnar, Sindre, Sveinar og familien elles. Medan konepone hadde med gullebarna til Eid på felespeling, organiserte mannbrann støypinga. Etter ei nervøs natt var det godt å kome i gang. No er vi endeleg ferdig med det som var hovudmålet for sommaren. Det er ein del ting som står att før snikkarane kjem, men no har vi ikkje slikt tidspress lenger. Det skal bli herleg å ha nokre dagar ferie neste veke, for no er vi nokså slitne. Og glade.

Ferdig å pusle mur!

2010-07-13T23:27:00.003+02:00

Etter intens jobbing med mur-puslespelet siste dagane er vi no ferdige med det! Det er ubeskriveleg herleg å sjå kor det har vakse opp av moldhaugen.
Vi har hatt litt problem med feillevering av murelement, og har brukt litt ekstra tid på å få det til. -Kombinert med tidvis ausregn og alvorlege mengder knott og mygg siste dagane, er det heilt utruleg at vi har komt så langt som vi har gjort.

Heldigvis har vi fått masse barnevakt dei siste dagane av farmorAlice, og det er vi veldig takksame for. Då har også konepone fått saga byggeklossar i høveleg storleik, klatra i stillas og klaska klossane på plass. Og så har vi fått mykje god hjelp frå pappaLeif, Steinar og Stein Arne. Og mannbrann er så uthaldande og flink at det må vere lov å skryte litt av han. Det har vore veldig kjekt med hjelpande hender siste dagane, for no ser det ut til at det vert støyping av muren torsdag. Kryss fingrane for det! I morgon gjer karane sikringsarbeid slik at muren er heilt stabil, og ikkje flyttar på seg, bular eller sprekk når betongen kjem.

Boble

2010-07-10T23:03:00.003+02:00

Jauvisst finst det andre ting i verda enn husbygging.

Venner får barn.
Nokre er på ferie.
Kanskje ein eller annan er sjuk.
Somme har kanskje heilt vanlege kvardagar.

Vi er visst i ei slags boble der det einaste som står i hovudet er å lage husmuren ferdig i tide og å ha bra dagar i lag med godingane våra. Men vi kjem att til den vanlege verda ein gong, trur eg. :) Takk for at de er tålmodige.

God julilaurdag

Torsdagskveld i Sollida

2010-07-08T22:23:00.003+02:00

Sofakveld medan mannbrann jobbar med store legobyggeklossar oppe i Solflekken.

Gutane og eg har hatt nokre fine, og litt lange dagar i feriemodus. Godt å merke at turtalet deira også går ned når dagen ikkje er full av "burde-burde". Vi svippar oppom tomta av og til, grev litt med leikegravemaskina der, måler diagonalar med sjefssnikkarpappaen og et ein sjokoladebit. Vi er veldig stolte av han som står på for vår del, for at vi skal få hus. Og så saknar vi han sjølvsagt også.

Vi er no i gang med muren, og har eit lite press på oss til å få den ferdig og sikra i tide til slutten av neste veke. Då må betongbilen kome og fylle muren, før arbeidarane tek ferie. Det er nervepirrande, men vi er fast bestemte på at det skal gå.

Men i kveld er det sofa. Og venting. På nytt frå han som tryllar hus til oss.

Vårt hus skal byggjast ut av gledje!

2010-07-05T21:56:00.004+02:00

...og betong, tre og jarn:)
I dag var det dugnad då fundamentet skulle støypast. Gunnar, Steinar, PappaLeif, Yngve og Johannes var veldig flinke, og resultatet vert avduka i morgon. Då skal kassane vekk. Attpåtil slapp vi å lage middag, for det kom "take-away-fiskegrateng" frå Stryn.

Det er så kjekt å sjå kor det tek form. Vi har drøymt om huset så lenge, og er så glade for å vere i gang. Og no er vi det verkeleg!

For dei som er nyfikne og har vore opppom Solflekken: Innkøyrsla til huset er laga til slik at anleggsmaskinene kan kome seg opp til huset, men vi er så klart ikkje ferdige med muren og med å fylle masse der hagen skal vere enno. Her må vi tenkje fleire kloke tankar før vi bestemmer oss. Vi treng dessutan ikkje så stor oppstillingsplass seinare, så sjølv om det er heilt supert tillaga no får vi endre på uteområdet når byggjearbeidet går mot slutten. Men du verda kor lettvint Steinar har laga det til, med plass til alt frå betongbil til murleveranse frå Vartdal plast.

Ha ein vidunderleg sommarkveld.

Fundament i SOLflekken

2010-07-01T22:30:00.007+02:00

FOR ei kjekk veke dette har vore, med tanke på alt som har skjedd opp i Solflekken. Steinar har gjort ein kjempejobb med å grøfte og leggje ned alle slags rør både for å føre vatn inn og ut av huset, straum og andre ting som skal liggje ned i bakken. No har gravaren rydda så fint rundt der huset skal stå, så det er lettvint å køyre lastebil opp og lesse av mur og materiale. Gravemaskina er flytta, og vi er veldig takksame for jobben i Solflekken, svigerfar!

Konepone og gutane er oppom kvar dag og sjekkar framgongen. Johs er ein skikkeleg arbeidskar, og nyttar kvart høve til å krafse litt i grusen, eller å spikre litt på ein forskalingsplanke. Lisjebroren er litt meir forsiktig, men han vil også helst berre springe rundt der oppe, og blir betutta når vi køyrer derifrå. Denne veka har gutane vore i barnehagen, og då har også konepone fått hjelpt til litt, og er veldig glad for det. Det er stas for oss begge å kunne byggje huset vårt i lag, sjølv om mannbrann naturlegvis er mest aktiv i bygginga.

I dag har pappaLeif komt frå Stryn og vore sjefs-forskalingssnikkar. Uvurderleg hjelp også frå den kanten. Vi brukar leigde forskalingskassettar som vi forsterkar og koplar saman med plank og spikar, og nokre spesialsnikra kassettar. Alle vinklar må naturlegvis vere heilt rette, og i water. Dei kom imponerande langt i dag, hurra hurra! Meir slikt arbeid i morgon, og så vert soleringen støypt måndag. Uendeleg godt å sjå at no veks huset også over bakken, og ikkje berre nedi jorda og bak i fjellet.

Frå ein 4-årings ståstad

2010-06-24T23:02:00.009+02:00

Johannes var med papsen og farfar "på jobb" og fekk knipse det han såg med fotoapparatet. Resultatet vart nærare 80 bilete av alt mogleg. Herleg å sjå verda frå hans perspektiv. Ungane har skjønt at det tek laaang tid før vi kan flytte inn i nyehuset, og har slutta å spørje om kor tid det skjer. :)

Ovanfor ser du at Johs har dokumentert at drensrøra er på plass.

No er sikringsgjerdet på plass, og vi håpar indarleg at ingen vasar seg ned i den djupe hôla, som etter kvart skal verte kjellargolvet vårt. Steinar og Yngve har funne fjell i bakkant av tomta, og i kveld har dei bora 32 hôl som skal fyllast med dynamitt i morgon. Pang, så blir det så bra så.

Konepone har på si side også ordna hus-ting i dag: Utforming av vindaugsomramming, utsjånad på verandarekkverk, og så har eg vore å fått teikna vaskeromsinnreiing. Veldig god hjelp av Elin til det siste :)

Målet

2010-06-21T21:07:00.003+02:00

Yngve har reklamert for bloggen på jobben sin, og har fått tilbakemeldingar på at det hadde vore kjekt å sjå bilete av huset. Her er fronten, og ein kan finne fleire teikningar på dei første innlegga i Solflekken-bloggen.

I dag tok vi med Friskis opp i tomta til farfar. "Køyje gaaaveeemaaaskiiiin!" gaula Andreas. I dag var Steinar der, og gutane fekk køyre gravemaskina saman med han etter tur. Stor stas.

No er det planlegging av uteområde som står for tur, for vi må mure opp ein eller to murar i bakkant av huset slik at det ikkje berre er ein stor jordhaug. Det er veldig kjekt å sjå framgong dag for dag. :)

Ha ein god dag!

Nyrydding

2010-06-17T21:55:00.002+02:00

Siste nytt frå Solflekken er at det er stor graveaktivitet. Det er kjekt å sjå at det tek form, og at røtene er vekk og at vi står att med feiande flott jord og grunn. No er det grøfting, vekkøyring av masse og graving av dei siste 2/3-delen av det området der sjølve huset skal stå.

O happy day!!!

2010-06-09T22:31:00.004+02:00

Slik ser Solflekken ut med og utan gravemaskin

9. juni vart ein merkedag, for i dag har Steinar starta gravinga i tomta. Vi er overlykkelege og veldig takksame for det. Vi kjem nok til å endre utstikkinga litt, sidan vi har skråstilt huset vel mykje. Det vil verte best uteområde om ein slepp ein 2 meter høg mur bak til venstre i hagen, så derfor blir det nokre justeringar i morgon på koordinatane "ned på kommunen".
No er vi i gang. Hurra!

Mannbrann og konepone

2010-05-25T13:00:00.003+02:00

Mannbrann tenkjer på kor mange cm fyllmasse som skal til før isopor, før støyping av plate. Konepone tenkjer på kva fargar som vil passe godt til vår kvite kjøkeninnreiing med valnøttbenk. I går var vi til Hakallegarden og konepone vart superinspirert av heile staden. Kvifor er det ingen andre som hengjer opp måleria sine på utsida av veggen? Eller spraymålar oppvaskmaskina raud slik at koppestellet kjem til sin rett? I alle fall fekk eg litt åleine-koneponetid i den vidundarlege butikken der, og enda opp med eit fat, salatbestikk og skei i slik hardplast som kan brukast til alt. Det beste med alt er at det er herleg fargesterkt og glorete. Herleg. Gutane var også begeistra over besøket dit, og ville ha med både hengebuksvin og alpakka heim.

Ein million kvitveisar

2010-05-21T09:32:00.003+02:00

Endeleg kom våren og varmen. I Solflekken er det ein million kvitveisar, og det er så vakkert! Vi har planar om å spare eit tue eller to, og setje dei på plass etter at huset er komt opp. I tillegg er der heldigvis også stikker som markerer hjørna på huset på tomta. For tida er det mange som spør oss kva som skjer med huset, og som er forundra over at vi ikkje har komt i gang. Det er vi også, men vi ventar i kø, og vonar på oppstart snarast. :) Snikkarane har også venta i det lengste, i håp om at dei kunne reise huset før sommaren. Det er vi takksame for! No er vi over på plan B, som gjer at vi skal mure i sommar. Vårt mantra er og blir "Hus blir det", sjølv om dei siste vekene har vore ei stor tålmodsprøve.

Legg gjerne igjen ein kommentar av det optimistiske og muntre slaget. Ha ein god solskinsdag.

Sånn går nu dagan

2010-04-28T21:38:00.003+02:00

Det er heilt rart og veldig kjekt å sjå på besøksteljaren at det har vore 1100 treff på Solflekken. Takk for at de er interesserte i huset som skal kome, det opptek oss også. Det festlegaste er at det er så mange treff på bloggen, og så lite som skjer i tomta akkurat no. :)

Det er farleg å skrive oppstartsdato for graving, men vi vonar det ikkje er så veldig lenge til. Som plan A har vi å få grave og reise mur mellom 17. mai og 1. juni. Så får vi sjå om det går. Det viktigaste er å ikkje mase på den ny-friske gravaren.

Enn så lenge gledar vi oss over å vere i lag, for heldigvis er det slik at folka er dei same i gammalt og nytt hus. Dei vil vi ikkje byte for alt i verda. (Kanskje pusse opp av og til, men... )

Ka e det so skjer????

2010-04-18T18:42:00.003+02:00

Veret har gått heilt bananas. Vi ser ut glaset, og alt er kvitt! Ikkje ein gong litt oske å sjå, berre snø.

Lett frustrasjon.

Men, held på å pusse opp litt møblar, og øve meg (AM) på å vere tålmodig. God søndagskveld.

Situasjonsrapport

2010-04-10T20:54:00.003+02:00

150 sekkar og eit vedalad på 10m x 1,6 m står til tørk i Hjartåbygda. Takk til pappaLeif og pappaSteinar for all god hjelp med veden!

Byggjesøknaden er godkjend, og det er vi sjølvsagt veldig letta over.

Komande veke vert huset stukke ut på tomta, og etter det er det kanskje ikkje så lenge til graving.

Vi gler oss!

Påskekos

2010-03-30T22:37:00.003+02:00

I går og i dag har vi vore flittige maur og fylt 132 sekkar med ved frå Solflekken. Enno er vi ikkje ferdige, men no er vi såre i hendene og skal på påsketur til Stryn.

Her ein morgon vakna vi midt i tett skoddehav. Så svippa vi oppom Solflekken. Berre sjå!

Oppmeldingsmøte

2010-03-24T21:59:00.002+01:00

Oppmeldingsmøte i dag, der vi avgjorde husfarge, takfarge, dører, veggar, tak +++ Kjekt og greitt.

For dei som har vore aktivt deltakande i taksteinsdebatten kan vi no opplyse om at vi har valt Zanda Rustikk Antikk, som er ein raud-brun-svart "antikk" takstein. Eller "spraglete mørk raudbrun" som eg vil kalle det. Trur det vil stå fint til lysegrått hus og kvit omramming og mur. Vonar alle tilhengarar av svart takstein likevel vil kome på besøk når den tid kjem.

Med ein gravemaskinførande svigerfar litt ute av spel for tida tek vi livet med ro, og ser fram til ei påske med lamming og familiekos. Når han kjem seg, vert det saaakte graving, og etter kvart mur.

DET ER VÅR!!!

Vi har gravemaskin!

2010-03-10T22:12:00.002+01:00

I dag var svigerfar Steinar oppe på tomta med gravemaskina si. Han hadde sjølvsagt rett i at det var meiningslaust å grave fram tømmerstokkane med handemakt. Då var det mykje meir effektivt med gravemaskin, så klart. I morgon vil han køyre stokkane inn i Hjartåbygda, slik at vi kan sage dei opp og lagre veden der. Det er visstnok så mykje som to lastebillass, så det skal varme godt om eit år eller to. Vi er veldig glade for god hjelp og for lagringsplass. Det hadde ikkje blitt hus utan dei snille og flinke fedrane våre. :)

Vi er også veldig glade for nokre dagar mildvèr og håpar det held fram, trass i at yr.no fortel om store snømengder til veka igjen. No har vi avtalt "utstikking" av huset på tomta, så det får heller bli litt snømoking når det nærmar seg påske.

Det er veldig kjekt at det endeleg skjer noko i Solflekken igjen. Veldig merkeleg å byggje hus akkurat den vinteren det er meir snø enn nokon gong, men det BLIR hus...

Peder Stol

2010-02-27T17:10:00.005+01:00

Som eg las i Fjordingen for litt sidan er det ein spesiell dag 22. februar. Den heiter Peder Stol, og frå denne dagen startar smeltinga også frå grunnen. Med andre ord så gjer grunnvarmen slik at det går mot vår no, sjølv om det er kaldt i lufta. VELDIG gode nyheiter for utålmodige husbyggjarar.

Kjøkenet er nesten ferdigteikna, det står berre att å velje kvitevarer og innebygd/frittståande kjøleskap. Kvitevarene har inga hast i heile tatt, men vi må nok velje det med kjøleskapet før kjøkenet vert tinga. Kjekt å ha nokre husting å jobbe med.

Skogryddinga er ferdig

2010-02-20T22:06:00.004+01:00

Vakker utsikt frå Solflekken i dag. Yngve saga dei siste 8 trea i strålande sol og -8 grader. Mykje snø, så tomta vert ikkje moka i vinterferien. Med ei snødjupn på 105 cm er der omlag 800 kubikk med snø...Vi satsar heller på mildver dei næraste vekene. :) Nabovarselet er kome attende utan merknader, og vi håpar på rask kommunal sakshandsaming.

Det er noko spesielt med det å planleggje bygginga av eit hus. Mange seier "Å då får de det akkurat som de vil!", men det står att å sjå. Vi får velje løysingane sjølve ut frå vår økonomi, men må også tenkje nøkternt og med hovudet. Det kan vere utfordrande, men vi er veldig takksame for at vi ikkje har blitt bitne av luksusfella til no. Enn så lenge er det mange standardløysingar med små endringar. Og i dag las eg noko som eg (AM) syns var veldig klokt: "Det er viktig at ikkje heimen ser ut som ein utstillingskatalog, men at tinga i huset også IKKJE passar saman". Heia til det.

Men altså. Enn så lenge ser Solflekken ut som på biletet ovanfor. Som Johannes sa i dag: "Karr e tomta, mamma? Her e jo heilt tomt."

Kjøkenspørsmål

2010-02-10T21:36:00.003+01:00

Det eg skal spørje deg om no gjeld nok ikkje eit av livet største og viktigaste val. Faktisk kan det ikkje kome opp på lista over dei nest viktigaste verdsspørsmåla ein gong. Men... Likvel skal det takast stilling til:

Har du ein U-forma/hesteskoforma kjøkenbenk? Kva er den perfekte avstand mellom dei to benkane som då står ovanfor kvarandre? Ikkje for langt, slik at ein må gå metervis mellom benkane, men ikkje så tett at ein må ut for å tenkje? Jatakk for svar.

:)

Snøflekken?

2010-01-30T13:32:00.002+01:00

Lite nytt frå Solflekken for tida. Kanskje vi heller skal kalle det Snøflekken, for med ein meter snø er det ikkje så lett å sage. Menmen. Vi er strålande nøgde med at det berre står att 8 tre, og å køyre vekk eit par lastebillass med "staur". Elles er nabovarselet sendt ut, og vi håpar på rask handsaming av den kommunale byggjesøknaden.

Oppi lida der det snør
kjem det snart eit hus med ei dør
Der kan du få banke på
Vi skal sei: Kom inn og sjå!
Du skal få ein kaffiskvett
og mat så du vert glad og mett

Enno er der kaldt og kvitt
og slik endar diktet mitt

(Yngve og Anne Marta)

Planløysing

2010-01-20T20:11:00.006+01:00

Hovudinngangen er i kjellaren. Den observante blogglesar vil sjå at det er berre rommet i midten av denne etasjen som vert møblert og innreia i starten. Der blir det ein stor gang med varme i golvet.

I hovudetasjen finn du allrommet med kjøkenkrok. Der kjem vi til å setje opp ei øy eller ein benk som deler av rommet litt. Frå vaskerommet er det dør ut bak huset, og attmed er det lisje-do. (Ikkje ute altså, men attmed vaskerommet)

På loftet er det tre soverom, bad og ei loftsstove.
Teikningane er ikkje så veldig tydelege når dei er forminska så mykje, men dei viser litt i alle fall.

Husteikningar

2010-01-19T20:49:00.003+01:00

I dag fekk vi dei endelege teikningane av huset vårt. Vi har teke utgangspunkt i huset som heiter "Nanna" i Mesterhuskatalogen, men har endra ein god del. No er vi veldig godt nøgde, skulle nesten ønskje at det er som i "Teikneby" i Barne-TV, der teikningane berre 'poff' vert verkelege. :)

Kart over tomtene i Bratteberg 1, aust

2009-12-19T22:38:00.005+01:00

Her ser du ei oversikt over tomtene i det nye feltet i Bratteberg 1, aust. Blå bokstavar L og R tyder Ledig og Reservert. Kvite firkantar med tynn raud strek rundt er kjøpte tomter. Vår er i øvste rekkje, nr 4 frå venstre. Som de ser er tomta til venstre for oss seld, og to av dei nedanfor oss. Vi ser fram til å få naboar allereie frå starten. Det vert kjekt å sjå kven desse er. :)
Etter det vi veit heiter vegen "vår" Dalevegen, og den nedanfor Bratteberg. Vi syns kanskje dei kunne funne på noko meir spenstig, men det får så vere. Johannes meiner vegen vår godt kan heite "Abra hamn", etter Kaptein Sabeltann sin heimstad.

(Kartet er henta frå Sunnmorskart.no)

Stor dag! Kontraktsmøte

2009-12-14T20:54:00.003+01:00

I dag, 14. desember underteikna vi kontrakt med Mesterhus. Vi har brukt nokre kveldar til høgtlesing for kvarandre frå kontrakta, leveransepapir, lovverk og andre kloke dokument. No kjenner vi oss trygge på at vi har vore innom det meste, og syns møtet i dag var rett så bra. Vi skal skoge, mure og gjere innreiingsarbeidet sjølve, medan Steinar (far til Yngve) grev tomt og veg. Mesterhus reiser huset og gjer det ferdig utvendig, byggjer bad og stiller med komplett materialpakke og koordinerer arbeidet.
Når vi får teikningane att frå arkitekten tenkjer eg at det blir eit bilete å sjå på også her inne. :)
Tjohoooo, i dag blir det pizzakveldsmat

Skoging

2009-12-05T22:15:00.002+01:00

Vi skriv 5. desember, og i dag har vi skoga om lag halvparten av tomta. Nydeleg ver, nokre grader pluss, og stort pågangsmot. Om ikkje vi kan seie at vi har "sett første spadetak i jorda", kan vi i alle fall seie at vi har "sett første motorsagblad i treet". Yngve starta i ti-tida, og fekk etter kvart hjelp av Steinar. Alice og Stein passa gutane, så Anne Marta fekk hjelpe til med kvistane, eller "strongane" og "skatet", som det visstnok heiter. Stor lykkekjensle av å få byrje på arbeidet. Dette er vi verkeleg klare for. Håpar arbeidslysta held seg oppe i løpet av det komande året.

Vi ser at kommunen har feilmerka tomta i høve til kartet, men det let seg vel ordne med ein telefon til dei på måndag. Det er litt kjedeleg med 12,5 m for smal tomt. Men som sagt, det let seg vel ordne. :) God helg, kjære Solflekkblogglesarar

<

Tomtemerke på plass

2009-11-21T21:08:00.003+01:00

I dag var vi oppom Solflekken vår for å kike på tomtemerka som no er komne på plass. Namnet Solflekken verka litt ironisk der vi stod i vind og surt regn. Den planlagde skoginga vart med andre ord avlyst. Vi har ikkje akkurat hastverk med å få sett spaden i jorda, men det hadde vore bra å få utnytta det tørre veret som har vore siste månaden, til å skoge litt. Vi ser fram til 15. desember, for då skal maskinlaget som lagar veg inn til tomtene vere ferdig, og vegen vert opna.

Men, vi kika på standardflisene til Mesterhus hos MålarOlav, og var på kafé etterpå. Veldig stas det også.

God helg!

Tomt nr 65, her kjem vi

2009-11-17T22:34:00.000+01:00

1. oktober 2009 vart vi tildelt tomt nr 65 i Bratteberg 1 Aust-feltet. Stor jubel i heimen! Før det har vi hatt ein lang prosess med vurderingar fram og tilbake om vi skulle kjøpe hus, byggje hus, kjøpe tomannsbustad, einebustad. Og så siste variant: Kjøpe tomt, og setje opp telt.

Enno er ikkje første spadetak sett i jorda, men det kan kanskje vere interessant å sjå utgangspunktet no, og forhåpentlegvis sjå ei viss utvikling det næraste året, pluss nokre månader.